කොළඹ, ගම්පහ, කලූතර, පුත්තලම, මහනුවර සහ යාපනය යන දිස්ති‍්‍රක්ක හැර සෙසු දිස්ති‍්‍රක්කවලට පනවා ඇති ඇඳිරි නීතිය අද (16) පෙරවරු 06.00 ට තාවකාලිකව ඉවත් කෙරුණා.
එම දිස්ති‍්‍රක්කවලට අද පස්වරු 04.00 ට යළි ඇඳිරි නීතිය පැනවෙන අතර එය ලබන 20 වැනිදා පෙරවරු 06.00 දක්වා කි‍්‍රයාත්මක බවයි ජනාධිපති මාධ්‍ය අංශය නිවේදනය කළේ.
ඉන්පසුව ඇඳිරි නීතිය පැනවීම පිළිබඳ 20 වැනිදා පෙරවරු 06.00 න් පසු දැනුම් දෙන බව ද මෙහිදී ප‍්‍රකාශ කෙරුණා.
මේ අතර කොරෝනා වෛරසය ව්‍යාප්තියේ අධි අවදානම් කලාප ලෙස හඳුනාගෙන ඇති කොළඹ, ගම්පහ, කලූතර, පුත්තලම, මහනුවර සහ යාපනය යන දිස්ති‍්‍රක්කවලට පනවා ඇති ඇඳීරි නීතිය නැවත දැනුම්දෙන තුරු අඛණ්ඩව කි‍්‍රයාත්මකයි.
අද දිනයේ තාවකාලිකව ඇඳිරි නීතිය ඉවත් කෙරෙන දිස්ති‍්‍රක්කවල භාණ්ඩ මිලදී ගැනීම් අත්‍යවශ්‍ය ද්‍රව්‍යවලට පමණක් සීමා කරන ලෙසත්, අනවශ්‍ය ගමන්බිමන්වලින් වළකින ලෙසත් ආරක්ෂක අංශ ජනතාවගෙන් ඉල්ලීමක් කරනවා. එමෙන්ම නගරවලට පැමිණීමේදී නිවසින් එක් අයෙකු පමණක් පැමිණෙන ලෙසයි පොලීසිය මෙහිදී ඉල්ලීමක් කළේ.
මුඛ ආවරණ නොපැළඳ පැමිණෙන පුද්ගලයින් නිවෙස් වෙත ආපසු හරවා යැවීමට කටයුතු කරන බවයි පොලිස් මාධ්‍ය ප‍්‍රකාශක, පොලිස් අධිකාරී ජාලිය සේනාරත්න ප‍්‍රකාශ කළේ.
ඇඳිරි නීතිය තාවකාලිකව ඉවත් කෙරෙන කාලසීමාවේදී මාර්ගවල නිකරුණේ ගැවසෙන පුද්ගලයින්ට එරෙහිව නීතිය දැඩිව කි‍්‍රයාත්මක කරන බව ද පොලිස් මාධ්‍ය ප‍්‍රකාශක, පොලිස් අධිකාරී ජාලිය සේනාරත්න වැඩිදුරටත් ප‍්‍රකාශ කළා.
No comments:
Post a Comment